Кыргызстанда үч жаңы коммерциялык банк пайда болот

Бул тууралуу Banks.kg порталына Улуттук банктан билдиришти.  

Улуттук банк банк мыйзамдарынын ченемдерине жана Улуттук банктын ченемдик укуктук актыларына ылайык түзүлгөн банктардын уюштуруучуларына банктарды түзүүгө уруксат алгандан кийин уставдык капиталды түзүү жана банктардын ишин баштоо үчүн даярдык иш-чараларын жүргүзүү үчүн 6 айдан ашпаган мөөнөт берилерин белгиледи. Банк мыйзамдарында белгиленген бардык талаптар аткарылгандан кийин уюштуруучулар лицензия алууга арыз беришет.

Эске салсак, ушул аптада Кыргызстандын Юстиция министрлиги жаңы банкты – «Алма Финанс Банк» ЖАКты каттоодон өткөрдү. Ал Кытайдын капиталынын катышуусу менен түзүлгөнү белгилүү. Банктын жетекчиси Ван Син деп жазылган. Юридикалык дареги Бишкек шаарындагы Огонбаев көчөсү, 222 дареги боюнча көрсөтүлгөн. Бул дагы Кыргызстандын рыногунда 2013-жылдан бери иштеп келе жаткан «Алма Кредит» микрофинансылык компаниясынын жайгашкан жери.

«Алма Финанс Банк» ЖАК жана «Мурас Банк» ЖАК уюштуруучулары банктык лицензияга арыз берүү боюнча зарыл чараларды көрүп жатышат. Өз кезегинде «Асман Банк» ЖАК уюштуруучусунун арызы банк мыйзамдарынын нормаларына жана лицензия алуу үчүн арызды кароо тартибине ылайык, кароо стадиясында турат», - деп белгилешти Улуттук банктан.